يا بلد

عارفة يا بلدى انت ناقصك ايه
راجل طيب رحيم يجعل خده مداس
ويشيلك جوه عنيه

يمشى وسط الناس من غير حرس
مش كل ما يحتاج يعطس
يضرب بايده الجرس

ايد فيها كرباج والتانيه فيها ورده
يلسوع ضهر الظالم
ويطبطب على كل والده

ادامه عقاب ربنا ميقبلش يكون له هيلمان
يعرف يفرق بين الظلم والحق
بين البرىء والسجان

العدل عنده مش مجرد ورق ولا حيثيات محكمة
العدل عنده ضمير واع يرشده
ولو جابوله ميت الف مكلمه

ميخافش من رصاصة طايشة ما دام وسط الناس
ما هو عارف ان الدنيا اجل
ولو قفلوا عليه ميت ترباس

اخص عليكى يا بلد الملايين
مش قادرة ارضك تجيب لنا عمر هع هع
يا عم متقولش هع طب تجيب صلاح الدين

هو يعنى علشان واحد يعيش
انضرب انا على قفايا
ويجرى حتى فى الحلم
الف كلب ورايا

طب ازاى يا بلد دا طول عمر ارضك بتحبل م الحلال
واسالى الدم اللى سال
اجيال ورا اجيال

هيطلع منك يا بلد ولد انما ايه ولد
وابقى قولى
اللى كتب الكلام ده قال

بس امانه تترحمى عليا وقتها
وتقولى كان فى واحد هنا
واثق فى طهارتك وانك يا بلد هتعدى المحال

بقولك يا بلد كلمه فى ودنك
بعد كل الضنك والذل والضيق
اوعى تتمخضى وتجيبى لنا
واحد بعد القهر زى المدعو شفيق

6-6-2012
قطار سوهاج القاهرة