التنسيق

نجح الولد وجاب مجموع هايل و هيحقق امنيتة ويدخل كلية من كليات القمة التى طالما حلم بها
كان نفسة يدخل قسم حنفيات وكمان مش هيروح يعمل زحمة فى التنسيق والتنسيق بقى الكترونى يا جدعان ايه الحلاوة دى
ملأ الولد الرغبات واختارها بعناية وفعلا جت له الكلية اللى هو نشن عليها فلما بحث لقى الكلية اللى جات له مفيهاش قسم حنفيات فيعمل ايه يعمل ايه قام قال احول كلية تانية ما دام المجموع بتاعى يجيب
فراح يحول
قال له البيه مفيش تحويل بقت اقليمى يا حبيبى
هو ايه ده اللى اقليمى
قال له الكليات يعنى لو عندك فى منطقتك كلية وفيها اماكن يبقى ما تروحش فى كلية تانية
قال له بس الكلية اللى عندنا مفيهاش قسم حنفيات
قال تعليمات يا حبيبى ومتوجعش راسى انا مش فاضيلك
قام الواد ما صدق خبر واشتكى وجه سعادة البيه المسئول الكبيروكان كلامة كله حكم بصراحة
الواد بيقول له: سعادتك أنا عاوز احول من الكلية دى اروح الكلية اللى فى أخر الدنيا
قال له ليه حبيبى
قال الواد علشان انا بحب قسم الحنفيات ودى اللى فيها القسم دةقال لا مينفعش بقت اقليمى والتحويلات بنسبة معينة وعدى ميعادهاقال له الواد ميعاد ايه دا انا لا شفت مواعيد معلنة ولا حد عارف حاجة
قال له البية يا بنى خليك جنب أهلك يمكن يعوزوك وبلاش شحططة فى المواصلات كل يوم والتانىانا عاوز مصلحتك شفت أنا خايف عليك ازاى
الواد يا بيه متخافش عليا انا واخد على كدة بس المهم ادخل قسم الحنفيات
رد المسئول وقال له وماله قسم المواسير مش عاجبك فيه ايه وكله زى بعضةحاجة عجيبة فعلا

الواد مجموعة كبير وعاوز يدخل قسم معين فى كلية معينة فى بلد معينة ومش عارف يروحها علشان اقليمىدة كان مفهوم فى كليات التربية زمان وايام ما كان فيه تعيين لكن دلوقتى علشان ايه المواصلات يا سلام يعنى الواد يحرم انه يدخل مثلا كلية فى اسكندرية او القاهرة لمجرد انه ميتشحططش فى المواصلات مع ان هذه الكليات لها الافضلية عند التقدم لأى وظيفة اذا كان يعنى فيه وظايف

والحجة ايه اقليمى هذا الحوار دار فعلا فى احد البرامج مع فتاه خريجة ثانوية عاوزة تدخل قسم معين فى كلية معينة