تـــــــــاج 02- تاجين فى تاج

ثانى مرة أجاوب على تاج وسوف أدمج تاجين مع بعض فى تاج واحد من روح وريحان وايضا من doba

وطبعا لازم أجاوب لحسن ميحصلش كويس وكمان المهندس عصفور مهددنى وانتم متعرفوش ممكن يعمل ايه

نبدأ بالاجابة على التاج والله المستعان

اسم مدونتك؟

الطائر الحزين-راجى عفو الله

لماذا اخترته ..وماهي نيتك من وراء اختياره؟
اعتقد انه حالى أما عن نيتى كان لشىء يعبر عنى وطبعا النية من الاسم شيء النية من المدونة شىء أخر

هل فكرت في إغلاق مدونتك؟ والسبب؟

ايوة فكرت او على الاقل اغلاق التعليقات
السبب لما بيكون فى اطراء على المدونة بشعر انى فى حجم أكبر من حجمى والله بجد وبخجل من نفسى فيما يرانى به الناس وارى به نفسى

صورتك في المدونة ورمزيتها ؟؟

مفيش صورة

لماذا دخلت عالم التدوين من الاساس؟

الله يسامحة اللى كان السبب
أكتب آرائى وخواطرى و تكون محفوظة وسهلة الرجوع اليها لعل ينفع بها الله احد او تكون سبب فى هداية شخص ما

جمله قيلت لك فى وصف مدونتك؟

الحمد لله حسن ظن عند معظم الناس
صاحبة مدونة روح وريحان قالت ان تدوينة المثلية تعدها افضل تدوينة قرأتها
جزاها الله خيرا

احلى بوست كتبته ...ضع اللينك , ثم اذكر لماذا؟
اثنان المنطوق والمقصود و بين ذراعيها

التعليقات بالنسبه لك ,اهميتها؟

التعليقات هى روح المدونة والتفاعل الحقيقى والتى تعطيها ديناميكية
اهميتها ابراز ما لم اقوله واحيانا ما لم أقصدة وتفتح عندى اشياء لم اكن اقصدها الى ان التعليق ابرزها من الكلام

أفضل مدونة قرأتها؟

كل مدونة دخلتها فيها ميزة عن الأخرى

حد قل أدبه فى التعليق إيه رد فعلك؟

لا الحمد لله لسه

أسوأ مدونة؟

من يجهرون بالمعصية ولا تتسع صدورهم للحق

أسوأ مدون ؟
مش عارف

هيحصل ايه لإيميلك لما تموت ؟؟

هكتب الباسورد فى الوصية

اديت الباسوورد لحد قبل كده؟

بتاع الايميل ده لأ

كانت إيه طبيعة علاقتك بيه؟

قلنا لا

اسمك؟
ايهاب

المشهور بيه وسط اصحابك؟

ايهاب

عمرك؟؟

اربعه وثلاثون عاما ونصف

برجك ؟؟

مليش فى الابراج و لا العمارات

دراستك؟؟ مجالك؟؟

خدمة اجتماعية
قسم برامج كمبيوتر تخصص دعم فنى وليه شوية فى الحسابات
بلاش ضحك دى الحقيقة

شخصيتك نوعها إيه؟

مش عارف فعلا مش بعرف احكم على نفسى بس لو فيه اختيارات ممكن أجاوب

السفر بالنسبة لك؟

سبع فوائد وتعب وزهق وقطعه من النار بس أكل العيش بقى

وقت فراغك بتعمل فيه إيه؟

يعنى لما يبقى مفيش أى حاجة اعملها نفسى ارجع اقرأ زى الاول

المود بتاعك؟

مود ايه بس انا عارف يمكن على حسب الموقف والوضع اللى انا فيه يعنى مفيش حاجة ثابتة لكن أنا قليل الكلام

الاكلة المفضلة؟

الرز المعمر لما بيبات ويرجع يسخن تانى

الصفات اللي أخدتها من بابا؟

الشكل و الانصاف والعصبية-الكتمان

الصفات التي أخدتها من ماما ؟

التحمل والصبر

اكتر ست حاجات بكرهها؟

الجور – استغلال النفوذ على الضعفاء-الكذب – الدلع فى الشغل-التأخير فى المواعيد-اسرائيل-الجدل فى البديهيات

اكتر ست حاجات بحبها؟

العدل – الصدق – الالتزام بالمواعيد-الاخلاص-كل حاجة تكون فى وقتها-مكة والمدينة وحشونى

الشغل بالنسبة لك؟

حياتى

الانترنت بالنسبه لك؟

ساعات بخاف منه انى أدمنه مثلا

لو اجتمعت انت وحسني مبارك في غرفة واحده؟

هالقى عليه السلام لو رد هاقول له كفاية ان مكنش علشانا يبقى علشان صحتك مين يقدر يتحمل مسئولية 70 مليون الفترة دى كلها

لو معاك مليون ونص جنيه......تعمل بيهم ايه؟
انا اعرف هاعمل ايه بالنص جنية لكن المليون دول معرفش
لكن اهم شىء أن يبقى عندك سكن ودابة الباقى بقى اللى محتاج يجى يأخذ
ويارب ما يغير بنا المال صفة جميلة كنا نتمتع بها

بتحب مصر؟
طبعا

بتحب البنات؟
ايوة

مسلم؟
الحمد لله على افضل نعمة انعم الله بها على

مين اكتر شخصية ما تقدرش تستغنى عنها في حياتك؟وليه؟
بجد كل من نحب وتعودنا وجودهم فراقهم صعب
حب من شئت فانك مفارقة

ايه اكتر موقف محرج اتعرضت ليه في حياتك؟واتصرفت ازاي؟
كنت رايح عند عميل تبع الشغل فى احد احياء القاهرة الراقية و قال لى على الدور وطلعت له والدور كان فية شقتين فقلت اضرب الجرس بس على اى شقة قلت تيمنوا
وضربت الجرس طلعت واحدة ماسكة منفضة وقمطة المنديل على شعرها قلت استاذ فلان موجود قبل ما اسمع الرد كان الباب مقفول فى وشى
عملت ايه عملت للخلف در طبعا

ايه الأمنية اللي بتدعي ربنا دايما انه يحققها لك؟
أموت على الشهادة

امرره لمين ؟
أى شخص يدخل عندى يتفضل ويجاوب وله الله