المدونين وتسرب المياه

تخيلت أن كل المدونين اجتمعوا فى شقة واحدة حصل لهم موقف معين تفتكروا هيكون الحوار بينهم ازاى ورد فعل كل واحد فيهم على الموقف هيكون ازاى

==================
طبعا محتاجين شقة ثلاث شوارع وميدان بمنافعهم علشان تسع المدونين فى الوضع واقفا

ولما تجمع المدونين فى الشقة الماء بدأ يتسرب من الماسورة نقطة نقطة

وقف عصفور

وقال لو سمحتوا هدوء يا خوانا عاوزين واحد بس يتكلم علشان الباقى يعرف يفهمه وانا بقترح اننا نشوف اصل المشكلة من الماسورة الأم....

رد شقير انتم اللى غلطانين ساكتين على اللى بيحصل فيكم أنا مش هنزل البلد دى تانى ولا حت أجازة

وظهرت صفات بنت خيخة الخيخية بوقوفها عند باب الخروج وقالت أوروفوار انا رايحة اكتوبر هى لعينة بس أحسن من تسرب الماية والبهدلة

بدأ الماء يكثر شوية وآبى لابسة نظارة سوده وقعت منها فى الماية قالت يوووه نظارتينى

قام نضال جاب لها النظارة و قالت له ميرسى وطلعت كيلنكس وقعدت تمسح فيها

ودخل الرايق متأخر وقال هاى ايفرى بودى مش عاوز حد ياخدنى بالحضن أنا هبوسكم نفر نفر وقال حاطط ايدة على بوئة وقال بوسه كبيرة للمدونين بس علشان انواع الانفلونزا اللى ماشية اليومين دول

ردت فرنسا ايه الوكسة اللى احنا فيها دي يعنى الواحد يسيب المجارى اللى فى العمارة يجى يلقيها هنا كمان صحيح الناس خيبتها السبت والحد احنا خيبتنا ما وردت على حد

رد الرايق ششششششش فرنستى تجلدى فين الصبر ايش حال اننا من عند القنال و حاربنا سنة 78

فرنسا نقطنا بسكاتك الله يخليك

فاتيما بقى اتكلمت وهى واقفة فى ركن بعيد كدة وقالت الله جميل اوى الواحد يجيب زرعة ورد ولما الماية تيجى عليه تكبر وتبقى جنينة ونفتح الشمس للشباك و تدخل ألوان قوس قزح

الصباغ وانا معايا الكاميرا وقال تعالوا نأخذ صورة جماعية واحنا فى الموقف الجميل ده حازو جنب بعض كدة

الفاتح الجعفرى بقى قال اهم حاجة بس يبقى فيه جامع جنبنا علشان لما الأذان يؤذن نسمعه

و أبو خالد قال : ايه يا ولاد من شوية ماية مش عارفين تصبروا شوية ليت الشباب يعود يوما بدل ما انتم قاعدين تتكلموا كدة شوفوا لنا محبس الماية فين

رد همس الاحباب : بيقولوا ان المحبس فى الشقة اللى فوقينا وبيقولوا كمان الشقة اللى فوق فيها ست قاعده لوحدها

طهقان : انا هضحى واطلع لها واعمل لكم المحبس بدل ما الماية تبوظ لنا هدومنا طبعا طول عمرى حنين القلب

طهقانة : يا اخى طيب راعى ابنك اللى جاى وخليك واقف معايا مش يمكن يجرى لى حاجة رد عليها طهقان الف سلامة عليكى أخ هو انت هنا معلش نسيت

يا مراكبى : بقى انا معنديش مشكلة لو الموج على هشد قلوعى واجرى

مصرواى أوى : بقى أنا سايب البنت المولودة وجاى لكم هنا يقوم يحصل الفصل دة بسر برضة انتم تستاهلوا التضحية

عايزة اتطلق : ايه رأيكم نكتب شكوى ونرفع قضية على الحى اصل انا بقيت خبرة فى المحاكم والحاجات دى

الدفاع : ليه هو أنا رحت فين عنك انت انا اللى هعمل كدة

شوية وشوية : يا اخونا الطيب أحسن انا لما اروح العمرة هدعى ان ربنا يسهلها لكم

مجداوية : محدش يتحرك من مكانة انا هرسم لكم كلكم لوحة بس مش وجوه لا كل واحد منكم هتخيلوا على شكل زهرة معينة ويبقى كل واحد منكم يشوف بقى نفسة

لماضة : تقول انا جعانه محدش معاه سندوتش ترد الكرمة قلبى المؤمن أنا معايا بقيت بسكوت من اول امبارح فى الشنطة خدية

صبرنى يارب : أكل ايه اللى بتفكروا فيه دلوقتى مش تشوفوا المشكلة اللى احنا فيها طبعا احنا ممكن كل واحد يمشى يروح بس صعب التجمع ده يحصل تانى فعاوزين نشوف حل سريع

رئيس جمهورية نفسى ماسك فى ايده حبل واخرة خطاف وبيقول أنا هرمى الحبل ده على البلكونة اللى فوق واطلع اقفل لكم المحبس

ملكة بحجابى بقى تقول دا أنا هكتب فيكم قصيدة وانتم كدة ملهاش حل وهنزلها فى أول عدد لما يبقى عندى جورنال وامسك رئيسة التحرير بتاعته

أم البنات : يعنى مش عارفين نستحمل شوية ماية ممكن تبل رجلينا دا احنا فى نعمة أمال الناس اللى معندهاش ماية خالص تعمل ايه

مجنونة فى بلد عاقل : يجوا يأخدوا من هنا

صوت من الوسط كدة بتاع دكتور حر يقول : يا جماعة لو حد حصل لكم حاجة الكشف عندى مجانى

هكذا علمتنى الحياة فى ظل العقيدة لازم نصبر على البلاء

عاشقة الفردوس واقفة فى ركن بعيد كدة وتقول ايه رأيكم اسليكم واقول لكم حدوتة

وعلى فكرة أنا ممكن أقولها لكم كلام من يوميات أمولة ولا من مذكرات شابة ولا ايه رأيكم نخليها خمسة فضفضة و كل واحد يقول حكاية من حكايات زمان

وممكن اخلى أم احمد تساعدنى وتحكى معايا وتقول شوية قصاقيص من عندها

طعمه تقول وانا اللى كنت جاية اتفك معاكم صحيح حظ دكر احنا لازم نعمل ثورة على الاوضاع دى بدل ما نبقى عاملين زى اللى عايشة فى الاحلام ولا زى اللى بترسم شخابيط على الماية

انها اساطير الخريف : المشكلة اننا زى اللى خايف من الحقيقة أو خايف يواجهها كل واحدة مفكرة نفسها سندريلا وكل واحد عايش بمزاج

سيبنى أحلم : وايه المشكلة لما نحلم ولا حتى نعيش فى شق القمر

مش قادرة : هو ايه ده هتقعدوا تتفلسفوا وتنسوا الماية اللى ممكن تغرقنا

فى العمق مكان للحرية : المشكلة مش فى ان الماية تغرقنا المشكلة فى الماية نفسها هى كنز مينفعش نضيعة

انتظروا معنا الجزء الثانى لنرى ماذا حدث للمدونين مع تسرب المياة و نقطه الماية