شهريار 2008

شهريار مودرن
========
لما سنحت الفرصة لشهرزاد  للقضاء على شهريار و تنتقم لبني جنسها لم يطاوعها قلبها و لمعت في رأسها فكرة و ساومت شهريار على عرشه  و تركت له فقط قصره و حشمه و تبرعت بالباقي لكل عائلة نكل بها شهريار و بذلك كفرت له عن ذنوبه 
..... 
لما إدحدر الحال بشهريار وأصبح يسكن بالايجار بعد أن أمن بالمساواه وحق المرأه فى الحياه وتزوج الست شهرزاد و لما كان لا يتقن أى حرفه ولا يفهم فى أى شغله

وطبعا هو راجل البيت والست شهرزاد مش بتعرف حاجة إلا الحكاوى و بعد ما تخلى عنه الحشم وباعه الخدم بعد أن تأخر عنهم راتب شهور وكانوا عايشين حتى من غير فطور فباع شهريار قصره حته حته علشان يأمن من الجرسة والفضيحة انه مش عارف يصرف على العروسة
ولما باع القصر ليسدد ديونة وإنتقل لشقة تلات مطارح بمنافعهم ايجار جديد واستلم

اخيرا شغل جديد....................

رجع شهريار من شغلة بعد ما طبق ورديتين فى و مش طايق حد يلمسة و لا يقرب منه وعرقة مرقة والعمة اللى لابسها فوق رأسه خلاص قربت تجيب له تربنتاته فى دماغه والقفطان اللى كاتم على مراوحه وكمه الواسع اللى مش مبين ايده الا من خلال منظار جاليلو وماشى يجرجر فى رجلة يا ولداه
وماسك جرنان فى ايدة اليمين علشان يحط عليه الأكل بدل ما الدنيا تتزروت وحاطه تحت باطه وشايل شنطه بلاستيك فيها شوية بصل من ابو جنيه الكيلو وفى الإيد التانية لافع بطيخة من الكبيرة ام الكيلو فيها بجنيه وربع يعنى دافع له فيها يجى كدة 12 جنيه وربع لما وصل على الباب مش عارف يفتح ولا حتى يضرب الجرس خايف ينزل البطيخة تتزحلق منه وخايف كمان على الجرنان اصله جايبة علشان يفرشة يحط عليه الأكل وخايف يتعفر من هباب البرك اللى ادام الباب فقام عامل حركة لولبية لوزعية وناطح جرس الباب إن حد يعبره مفيش ينطح تانى محدش راضى يعبره قال فى عقل باله

ايه هو مفيش حد جوه ولا ايه؟؟؟؟؟؟

امال راحو فين البشر؟؟؟؟؟؟؟؟؟؟

فين لقى صوت بينده يا ست ام ابن شهريار يا ست ام ابن شهريار ردت عليها وقالت لها نعم يا ست ام حلوتهم قال لها افتحى للمحروس شهريار بيضرب الجرس

قالت لها حاضر يا ختى ان شاء الله تربحى وتكسبى يارب

وشهريار واقف على الباب عمال يصب عرق ومستغرب بقى تسمعى الست ومتمسعيش الجرس وقام من غلبة عاوز يفش غله فقام مصقف بايدية الاثنين وقعت البطيخة ادششت وكمان الجرنال اتلحوس حته منه فى هباب البرك

فلموا باقى البطيخة أم 12 جنية وربع و دخل باقى الحاجات ونام على الحصيرة اللى فى الصالة وقام مشغل مروحة السقف ماركة ايديال ونام على ظهره وغمض عينة وقال يا سلااااااااااااااام

فجت الست المحروسة شهرزاد جنبه وقاعدت تقول له يا سلام دا انا النهاردة مدوقتش طعم النوم الواد مجنني معلشي يا خويا مسمعتش الجرس وانا لو كنت سمعته مكنتش هفتح ليه هو انا غاوية يعنى ولا غاوية ولا يعنى كنت غاوية ثوانى يا خويا احضر الأكل ودخلت تجهز فى الاكل والراجل مش بيحط منطق من كثرة التعب دا انا رحت السوق النهادرة والحاجة لقيتها غاليه نار وجبت من كل حاجة ارباع ارباع يعنى ربع فلفل وربع خيار وربع جزر بس الطماطم الوليه مردتش تدينى ربع اخدت منها نص وامرى لله منها لله مفترية ثوانى يكون الاكل جاهز

شهريار يقول اف بعد ما تمشى طبعا وتجهز الاكل

قوم الاكل جاهز دا انا ما صدقت الواد نام وقلت اقيل جنبه شوية لحسن طول الليل عمال يزن ومنمتش منه تعالى بقى الاكل هيبرد ولا لما يبرد هتقولى قومى سخنيه تانى وانا طبعا لا هقدر اسخن ولا انيل انا مش ناقصة كفاية الحر والولعه اللى احنا فيها

شهريار طيب طيب ايه ده مش انا واكل من الاكل ده قبل الوردية بتاعة المرة اللى فاتت امال رحتى السوق ليه بقى

شهرزاد هو ايه ده كمان عاوزنى اطبخ مش كفاية رحت السوق يعنى اروح السوق واطبخ فى نفس اليوم انت متعرفش السوق بيبقى عامل ازاى حاجة تقرف والجو نار يا دوب جيت نمنا انا والواد ومقمتش الا على صوت الست ام حلوتهم لما كنت انت بتضرب الجرس وانا مسمعتكش وهى ندهت عليا يا ست ام ابن شهريار

شهريار امرى لله قام من على الحصيرة وبانت الشبابيك الموجودة فى الفانلة بتاعته واول معلقة طبيخ قال لها ايه ده دا الطبيخ حامض !!!!!!!!!!!!!!!!

ردت شهر زاد حامض ايه بس دا انا لسه غالياه امبارح قبل ما انام دوقنى كدة اه تصدق حمض يا خسارة يا الله فى داهية

شهريار طيب امرنا لله

قومى شققى لنا البطيخة من البواقى اللى اتدششت دى وهاتى خرطة الجبنة القديمة اللى جوه يارب تكونى افتكرتى ونضفتيها من الدود مع انى عارف انك بتحبى الجبنة بالدود بتاعها بس ممكن تبقى تسيبى لك حبه بدودهم

ماشى قامت شققت البطيخة اللى طلعت حمرا شرار بصراحة ومرملة كمان وطعمها زى العسل امال ايه مش شهريار اللى جايبها وقام شهريار واخد شقة بطيخ اكلها وعمل صوت شفشفه وقال يا سلام البطيخ فى الحر ايه اوعى وشك بيدور على العيش علشان ياكل بيه الجبنة قال لها امال فين العيش يا ست؟؟؟؟؟؟؟؟؟؟؟!!!!!!!!!

قالت عيش عيش ايه هو انت مش قلت عاوز جبنة قديمة و بطيخ انت كنت جبت سيرة العيش انت بتنسى ولا ايه شكل كدة ضغط الشغل عليك زيادة اوى اليومين دول الله يكون فى عونك وينتقم من الظلمة حاجة غريبة هو انت متعرفش اننا معندناش عيش من اخر مرة جبت لنا فيها الخمس ارغفة انت مبتسمعش عن ازمة العيش ولا ايه هو انت مش عايش فى الدنيا ولا شغل الورادى الجديد اللى طلع لنا فى البخت ده لحس عقلك يا الله ولا بيجى لنا من وراه ابيض ولا اسود الا البطيخة اللى انت بتجيبها

قام شهريار بشويش يجرجر فى رجله وراح يمة البلكونة

وهى تقول له رايح فين عاوز تشم هوا ماشى زمان البلكونة دلوقتى طراوة ماشى اوعى تخبط فى القلة اللى على السور وتوقعها ما هى اللى حيلتنا وبنشرب منها

قال لها بصوت خافت لا متخافيش القله هتكون معايا ومشى وهب قام حادف نفسة من البلكونه والقله فى حضنه طبعا

وكلام الست شهرزاد ماشى وراه عمال يجرى وراه انت فين مش بترد ليه هو انا كنت قلت لك حاجة مكنوش شوية كلام الواحد بيفضفض بيهم معاك تقوم تعمل كدة تضيع نفسك وتعور نفسك اجيب لك انا منين دلوقتى مصاريف للجنازة والماعزة واللى هيقروا على روحك

شهريار شهريار

سمعت منه صوت مبحوح

متخافيش متخفافيش

القله سليمة
يا الله ربنا يستر علينا

سلام الى الابد