والله لما يجى ابوك ما انا الا قايله له

كالعادة بنبيت عند ستى أم ابويا وده بعد ما رحنا فى بيت لوحدنا ولما كان البيت اللى رحناه مكنش فيه نور وبالتالى مكنش عندنا تليفزيون فكنا بنروح عند ستى اللى هى عايشة مع عمى الكبير وكنا نعيش كأسرة كبيرة فى هذا المنزل الذى اتعجب الآن كيف كان يسعنا ولا يضج بنا فقد كان لعمى 5 ابناء منهم اربع بنات وولد واحد من نفس سنى - وهذا التفصيل يمكن اكتبة فى تدوينات قادمة-المهم الواقعه اللى بتكلم عليها ان ستى يرحمها الله كانت طيبة القلب بشكل غير عادى - لكن تباعد السن بيننا وبينها كان يسبب موافق كثير ساخرة المهم مش عارف ليه فى اليوم ده قلنا احنا هنبات عند ستى وكنا انا واخويا الاوسط واخويا الصغير اصل لسة اختى مكنتش لسه اتولدت اتفرجنا على التليفزيون اللى مش عارف كان بيعرض ايه وقتها ستى تنادى علينا يا ولاد قوموا نامو اواحنا نقول حاضر ومفيش حد يتحتح من مكانه - وشوية ستى بتسكت نحسبها نامت وصوتنا يعلى وفجأة يجى صوتها تانى يا بنى انت وهو قوموا ناموا وتنادى علينا باسامينا واد يا ايهاب واد يا عبدالله قوموا ناموا يا واد
واحنا ما نردش
طيب انت وهو والله العظيم لما يطلع الصبح - طيب والله العظيم لما يجى ابوك انت و هو ما انا الا قايله له - طيب ماشى يا ولاد مش قادرة اتكلم- فقمنا انا و ابن عمى واخويا مش عارف ليه يمكن علشان مكنش فيه حاجة فى التليفزيون او ان ستى الله يرحمها صعبت علينا و دخلنا معاها فى الاوضة على السرير التانى احنا الثلاثة واخويا الصغير لسه بره
وستى تنادى انت يا وله قوم نام- وهو يقول مش قايم- يا وله قوم نام لحسن اما يجى ابوك اقله- وهو يقول مش قايم
فقامت طافيه التليفزيون ودخلت الاوضة تانى- واخويا قال لها برده مش قايم وهى مش هاين عليها تنام الا لما هو يدخل مع انه معذبها ومش راضى يسمع كلامهاواخويا راسه وجزم البلد كلها ما يدخلش
وهى مش هاين عليها تنام من غير ما يقوم - و احنا من جوه كل ما نسمع صوت ستى تنادى عليه تيجى لنا هيستريا ضحك بس من غير صوت وساعات واحد فينا صوته يطلع ويتعرض للشتيمة من ستى وتقول بتضحكوا عليا طيب واللى صوته على يقول والله يا ستى ما بضحك عليكى انا بضحك على الواد اللى بره و بعد شوية تقول له انت يا وله قوم نام الدنيا ليلت خالص وهو بكل دماغ ناشفة يقول لها مش انتى طفيتى التليفزيون انا مش قايم وكانه بيعاقبها بجلوسة فهو تعبان و هى تعبانة واحنا جوه فى السرير بنضحك
وانا نفسى مش فاكر الموضوع رسى على ايه فى الاخرهل دخل نام وصحى الصبح ولا فضل صاحى للصبح اصله ممكن يعملها بصراحة
وفى النهاية عمر ما شفت ستى قالت على حاجة لابويا من اللى كنا بنعمهل مع انها كانت بتقول والله لما يجى ابوك ما انا الا قايله له