ساعات فى معرض الكتاب

قررت ليلة الجمعة الذهاب الى المعرض صباحا بعد الصلاة مباشرة فقد مضت اكثر من ثمانى سنوات لم أذهب

بدأ اليوم بطابور على فرن العيش وقفت فى الصف ويأتى اناس من الجنب يأخذوا خمسة ارغفة ومنهم اصحاب المعارف يأخذوا ما بدا لهم

ففكرت وقتها لو كتب اصحاب الفرن يافطة مكتوب عليها هذا طابور اصحاب المعارف والمحسوبيات هل سيقف هناك أحد؟؟؟؟؟؟؟؟؟

وجاء دور الواقف أمامى وكان طفل صغير فمد يده الصغيرة ليطلب العيش ردت عليه القائمة على شئون البيع فى الفرن روح يا حبيبى مفيش عيش هات أمك

قلت لها يا ستى الواد واقف فى الطابور من الصبح

قالت خليك فى نفسك يا استاذ هات فلوسك

قلت لها يعنى ايه قالت خليم فى حالك طبعا خلتنى فى حالى مش طالبة خناق على الصبح وبعد ما اخذت العيش وخارج وجدت الطفل يبكى هزنى الموقف فقلت له تعالى يا حبيبى و اخذت منه الفلوس ورجونا القائمة على شئون البيع فى الفرن أن تأتى بالعيش بواسطة أحد الاخوة الواقفين على فى الطابور وقد تم المراد

نسيت أقول لكم انه فى طابور النساء حدثت مشادة بين اثنتين على المكان وكل منهما تدعى لنفسها المكان قبل الأخر مع و فاز الاقوى فقالت المهزومة للمنتصرة

ولابسالى خمار يا ختى
ردت المنتصرة أحسن منك

وكأن المفترض على المخمرة أن تترك حقوقها ما دامت هى مختمرة

المهم تم المراد وجبت العيش وروحت وفطرت وتهيات الى الصلاة

ومنها على الميكروباص للذهاب الى القاهرة

وصلت حوالى الساعة 2.3 ومنه الى ركبت ميكروباص الى معرض الكتاب بعض مشادة بين اثنين من السائقين على الفوز بالزباين قبل الأخر

بعد فترة حملت العربية ووصلت بحمد الله امام مسجد القوات المسلحة أذان العصر

صليت الحمد الله وبدأت رحلة التجول فى المعرض

عند الوصول للبوابة

وجدت طابور

ايه ده

طابور ايه ايام زمان مكنش فيه طوابير قالوا دى تذكرة

قلت هو يوم الطوابير النهاردة ولا ايه

وقفت فى الطابور وكله على بعضة الى ان فزت بالتذكرة لقيت طابور تانى ينتظرنى حتى استطيع الدخول

يعنى طابور علشان اجيب تذكرة وطابور تانى علشان ادخل

ودخلت والناس عمالة بتنفخ

وطلعت ورقة وقلم وقلت اقارن بين الكتب اللى هتعجبنى والاسعار فى كل دار نشر

وبدأت بالعبيكان

الوقت يمر بسرعه ولم اشتر شيء وكتبت بعض اسماء الكتب واسعارها
لا تحزن لعائض القرنى - طريق الهجرتين بن القيم - وكتابين لمحمد قطب - ------- وكتب أخرى

ودخلت دار الشروق

وجدت فى الواجهة كتب المدونات الثلاث

قلت اقوم بجولة ثم احدد هل اشتري هذه الكتب أم لا

أخذت كتاب الفلسفة القرأنية للعقاد ------ وانتهيت بكتاب للاطفال

قلت ساشترى كتاب عايزة أتجوز دار حديث صغير

كانت نيتى فى الشراء للزمن فقد قرأت محتوى المتاب من التدوينه طبعا لكن بعد فترة من الزمن وبخاصة ان اصبحت الكاتبة مشهورة أن يكون لديك كتاب من اول طبعه شىء جميل

وجايز يدوا كمان جوايز عليه يبقى احلى واحلى

وكنت قد حدد الا اشترى الا كتاب عايزة أتجوز فقط لاسباب فى نفسى
المهم
قلت: بكام الكتاب
قالت: ب 11 جنيه

قالت :أكتب اهداء؟
قلت: مش مشكلة اى حاجة

قالت: يعنى مش مهم
قلت: طيب أكتبى للطائر الحزين

قالت: هو انت؟
تصدق انى كنت بعلق عندك وبحسبك بنت!!!!!!!!!!!!!!!!!!!!!!!!!!!

قلت : مائة علامة تعجب وسؤال لكنى وجدتنى أثرت كلمة الله يكرمك

وقلت بعدها يعنى معقولة اللى بيدخل يعلق عند حد مفيش حاجة بتلفت انتباهه ويحدد من خلالها نوع صاحب المدونة
ان كان ذكر ام انثى ؟؟؟
مع إن اول ما يسترعى الانتباه عند دخول المدونة هو كلمة راجى عفو الله

وقربت الساعه على الخامسة
وقررت العودة لارتباطات أخرى فى البيت


و بذلك تمت الساعتين فى المعرض


--